Një shtetas 25-vjeçar nga Kosova ka mbetur i plagosur rëndë pas një sulmi të ndodhur të dielën në Uznach të Zvicrës. Autoritetet zvicerane kanë arrestuar një të dyshuar 40-vjeçar me shtetësi zvicerane, ndërsa motivet dhe rrethanat e ngjarjes mbeten ende të paqarta.
Sipas Policisë Kantonale të St. Gallenit, ngjarja ka ndodhur pasditen e 7 qershorit në rrugën Grynaustrasse. Rreth orës 15:00, shërbimet e emergjencës morën një njoftim për një person të plagosur në rrugë.
Patrullat e policisë gjetën 25-vjeçarin në një dyqan pranë banesës së tij. Pas ndihmës së parë të dhënë nga ekipet mjekësore, ai u transportua me urgjencë në spital, pasi lëndimet e marra konsideroheshin të rrezikshme për jetën.
Nga hetimet paraprake dyshohet se 40-vjeçari ka hyrë në apartamentin e të riut kosovar dhe e ka sulmuar me një objekt të mprehtë, duke i shkaktuar plagë të rënda.
Policia ka bërë të ditur se marrëdhënia mes dy personave dhe motivi i sulmit nuk janë sqaruar ende. Në vendngjarje kanë intervenuar disa patrulla policore, ekspertë kriminalistikë dhe ekipet e ambulancës, ndërsa hetimet po zhvillohen nën drejtimin e Prokurorisë së Kantonit të St. Gallenit.