Ish-ministri i Financave, Arben Malaj, ka kërkuar publikisht largimin e kryeministrit Edi Rama, duke vlerësuar se kreu i qeverisë nuk ka më mundësi të sjellë zhvillime pozitive për vendin.
Duke komentuar protestat e fundit, ku është kërkuar dorëheqja e kryeministrit, Malaj u shpreh se vendimi për të qëndruar apo jo në detyrë i përket vetë Ramës, por paralajmëroi se këmbëngulja për të vazhduar në pushtet mund ta çojë vendin drejt praktikave gjithnjë e më autoritare.
“Largohet apo jo Rama, këtë e vendos ai vetë. Por çdo insistim për të qëndruar në pushtet, sipas meje, po e afron qeverisjen jo vetëm me autokracinë, por edhe me elementë të një qasjeje neodiktatoriale”, deklaroi Malaj.
Sipas ish-ministrit, përvoja historike ka treguar se regjimet autoritare nuk kanë përfunduar mirë, ndërsa Shqipëria ka nevojë për më shumë qetësi dhe bashkëpunim politik.
“Ka ardhur koha që ai të largohet. Nuk besoj se mund të bëjë më diçka të mirë për Shqipërinë. Klima e përçarjes, tensionet politike dhe konfliktet sociale nuk i shërbejnë zhvillimit të vendit”, tha Malaj gjatë një interviste për A2 CNN.
Deklaratat e tij vijnë në një periudhë tensionesh politike dhe protestash, ku opozita dhe grupe të ndryshme qytetare kanë shtuar kritikat ndaj qeverisë dhe kanë kërkuar ndryshime në drejtimin e vendit.