Bie ndjeshëm çmimi i naftës pas njoftimeve për marrëveshjen SHBA-Iran
Çmimet e naftës në tregjet ndërkombëtare kanë shënuar rënie të konsiderueshme pas lajmeve për arritjen e një marrëveshjeje mes Shteteve të Bashkuara dhe Iranit, e cila pritet të ndikojë në stabilizimin e furnizimit global me energji.
Kontratat e ardhshme të naftës së papërpunuar Brent ranë me 4.02%, duke zbritur në 83.82 dollarë për fuçi. Ndërkohë, nafta amerikane e tipit West Texas Intermediate (WTI) u tregtua me 80.95 dollarë për fuçi, me një rënie prej 4.63%.
Presidenti i SHBA-së, Donald Trump, deklaroi se Ngushtica e Hormuzit do të rihapet për qarkullimin e lirë detar dhe se bllokada detare amerikane ndaj porteve iraniane do të hiqet menjëherë.
“Anijet e botës, ndizni motorët. Le të rrjedhë nafta!”, shkroi Trump në reagimin e tij publik, duke e cilësuar marrëveshjen me Iranin si të përfunduar dhe duke uruar të gjitha palët për arritjen e saj.
Sipas deklaratave zyrtare, të dyja palët kanë shpallur ndërprerjen e menjëhershme dhe të përhershme të operacioneve ushtarake në të gjitha frontet, përfshirë edhe Libanin. Lajmi është konfirmuar edhe nga kryeministri i Pakistanit, i cili e ka cilësuar marrëveshjen si një hap të rëndësishëm drejt uljes së tensioneve në rajon.
Reagimi i tregjeve ka qenë i menjëhershëm, me investitorët që presin një rritje të furnizimit me naftë dhe ulje të rrezikut gjeopolitik në një nga zonat më të rëndësishme për tregtinë globale të energjisë.
