Rama paralajmëron socialistët: “Kjo është vetëm fillimi, duhet të jemi të përgatitur për sfidat që vijnë”
Kryeministri Edi Rama mblodhi këtë të shtunë Grupin Parlamentar të Partisë Socialiste, ku në fokus të diskutimeve ishin procesi i integrimit europian dhe projekti i investimit në Zvërnec.
Gjatë fjalës së tij, Rama iu referua protestave kundër projektit, duke i cilësuar ato si një sinjal paralajmërues për sfidat me të cilat do të përballet mazhoranca në vijim. Sipas tij, reagimet dhe kritikat nuk drejtohen vetëm ndaj tij personalisht, por ndaj gjithë shumicës qeverisëse.
“Kjo është një histori që duhet lexuar me kujdes. Nuk lidhet vetëm me mandatin tim, por me të gjithë shumicën qeverisëse. Mllefi që shfaqet sot ndaj meje dhe Partisë Socialiste është vetëm fillimi i asaj që mund të vijë më pas. Duhet të jemi të përgatitur për sfidat e ardhshme”, u shpreh Rama.
Kreu i qeverisë ndaloi edhe te ndikimi i rrjeteve sociale në debatin publik, duke argumentuar se në shumë raste rëndësi merr zhurma dhe jo thelbi i diskutimit. Ai theksoi se nuk është kundër kritikës, përkundrazi, e konsideron atë të domosdoshme për përmirësimin e qeverisjes.
“Qeveritë përmirësohen përmes kritikës dhe kundërshtive. Shpesh kemi ndryshuar qëndrime pikërisht falë argumenteve të ngritura nga kritikët. Problemi lind kur refuzohet dialogu dhe çdo mundësi për negociim. Ky nuk është vetëm një fenomen shqiptar, por një prirje që po shfaqet në shumë vende të botës”, tha ai.
Në vijim, Rama bëri dallimin mes rolit të opozitës dhe përgjegjësive të qeverisjes. Sipas tij, opozita ka luksin të premtojë dhe të kritikojë pa mbajtur barrën e vendimmarrjes, ndërsa qeveria duhet të përballet me sfida konkrete, kompromise dhe përgjegjësi të përditshme.
“Në opozitë mund të premtosh gjithçka dhe të mos mbash përgjegjësi për asgjë. Në qeveri duhet të marrësh vendime, të menaxhosh buxhete dhe të zgjidhësh probleme reale. Mund të mbrosh të gjithë zogjtë, por duhet të merresh edhe me gjahtarët”, deklaroi kryeministri.
Në përfundim, Rama nënvizoi se qeverisja është gjithmonë më e ekspozuar ndaj pakënaqësive publike, pasi përballet vazhdimisht me zgjedhje të vështira dhe kompromise, duke shtuar se “qeveria nuk është gjithmonë poetike”.