Kryeministri Edi Rama ka lëshuar kritika ndaj Elisa Spiropalit, Ditmir Bushatit dhe analistit Fatos Lubonja gjatë mbledhjes së Grupit Parlamentar të Partisë Socialiste.
Rama iu përgjigj deklaratave të zërave kritikë brenda dhe jashtë së majtës, duke mbrojtur integrimin europian si objektivin kryesor të vendit. Sipas tij, pretendimet se tema e anëtarësimit në Bashkimin Europian është “e konsumuar” nuk qëndrojnë, pasi procesi i integrimit mbetet një moment historik për Shqipërinë.
Duke iu referuar deklaratave të Elisa Spiropalit për nevojën e një “marrëveshjeje të re”, Rama ironizoi këtë qëndrim, ndërsa për Ditmir Bushatin komentoi idenë e “Shqipërisë së re”, duke kërkuar me ironi një projekt konkret për realizimin e saj.
Kreu i qeverisë nuk kurseu as Fatos Lubonjën, të cilin e përmendi në mënyrë ironike për pjesëmarrjen në protestë me një pankartë flamingoje në dorë.
“Ka edhe intelektualë të familjes sonë politike që thonë se karta e BE-së është e lodhur. Por karta e BE-së është karta e historisë së Shqipërisë. Ne nuk jemi këtu për të fituar klikimet e ditës, por për të fituar Shqipërinë 2030 në Bashkimin Europian”, deklaroi Rama.
Ai shtoi se idetë për një “marrëveshje të re” apo “Shqipëri të re” duhet të shoqërohen me propozime konkrete, duke ironizuar kundërshtarët e tij politikë dhe kritikët publikë.
“Do të kritikohemi, do të sulmohemi, por ne kemi detyrimin të mos zgjedhim rrugën më të lehtë”, u shpreh kryeministri.