Gjatë protestës së zhvilluar këtë mbrëmje, organizatorët dhe pjesëmarrësit bënë publike pesë kërkesat kryesore që, sipas tyre, duhet të përmbushen nga institucionet shtetërore.
Në krye të tyre është dorëheqja e kryeministrit Edi Rama, të cilën protestuesit e konsiderojnë si hapin e parë për adresimin e problemeve të ngritura gjatë tubimit.
Një tjetër kërkesë është krijimi i një qeverie teknike, e cila sipas tyre do të siguronte administrim të paanshëm të vendit dhe përgatitje më të rregullt të proceseve të ardhshme.
Protestuesit kërkojnë gjithashtu shfuqizimin e Ligjit për Zonat e Mbrojtura, duke argumentuar se ndryshimet e fundit kanë krijuar shqetësime për mbrojtjen e mjedisit dhe pasurive natyrore.
Në listë përfshihet edhe shfuqizimi i Ligjit për Investimet Strategjike, të cilin ata e konsiderojnë si një akt që ka favorizuar projekte të kundërshtuara nga komunitetet lokale dhe organizatat mjedisore.
Kërkesa e pestë lidhet me anulimin e plotë të projektit të njohur si “Paketa e Maleve”, një nismë që ka ngjallur debat të gjerë publik dhe kundërshtime nga shoqëria civile.
Organizatorët deklaruan se këto pesë pika përbëjnë bazën e qëndrimit të tyre dhe u bënë thirrje qytetarëve të vazhdojnë mobilizimin në mbështetje të kërkesave.
Protesta vijon, ndërsa mbetet për t’u parë zhvillimi i situatës në orët dhe ditët në vijim.