Mbi 130 mijë pensionistë vijojnë të punojnë në Shqipëri, shumica në bujqësi
Numri i shqiptarëve që mbeten aktivë në tregun e punës edhe pas daljes në pension ka shënuar rritje gjatë vitit 2025. Të dhënat më të fundit tregojnë se gjithnjë e më shumë të moshuar po vazhdojnë aktivitetin ekonomik, si për të siguruar të ardhura shtesë, ashtu edhe për shkak të stilit të tyre të jetesës.
Sipas statistikave të publikuara nga INSTAT, gjatë vitit 2025 janë regjistruar 130,274 persona të punësuar mbi moshën 65 vjeç, krahasuar me 119,862 një vit më parë. Kjo përkthehet në mbi 10 mijë pensionistë më shumë që vazhdojnë të jenë pjesë e tregut të punës.
Pjesa më e madhe e tyre janë të angazhuar në sektorin e bujqësisë, kryesisht si të vetëpunësuar. INSTAT i konsideron të punësuar edhe ata që punojnë në fermat familjare dhe prodhojnë kryesisht për nevojat e tyre.
Rritja e këtij grupi vjen paralelisht me plakjen graduale të popullsisë dhe tkurrjen e numrit të personave në moshë pune. Gjatë vitit 2025, popullsia mbi 15 vjeç ra në rreth 2 milionë banorë, ndërsa numri i personave ekonomikisht aktivë pësoi një rënie të lehtë.
Nga ana tjetër, pensionistët përbëjnë ende pjesën më të madhe të popullsisë ekonomikisht joaktive. Sipas raportit, 51 për qind e personave joaktivë mbi moshën 15 vjeç janë larguar nga tregu i punës për shkak të pensionit.
Ekspertët e lidhin këtë fenomen si me ndryshimet demografike, ashtu edhe me faktin se shumë pensionistë, veçanërisht në zonat rurale, vijojnë të merren me bujqësi edhe pas përfundimit të karrierës së tyre. Për një pjesë të tyre, puna në fermë mbetet jo vetëm burim të ardhurash, por edhe pjesë e përditshmërisë.
Megjithëse Shqipëria vazhdon të regjistrojë nivele të ulëta papunësie, tregu i punës po ndikohet gjithnjë e më shumë nga plakja e popullsisë dhe emigrimi. Rritja e numrit të pensionistëve që vazhdojnë të punojnë konsiderohet një nga treguesit më domethënës të këtyre ndryshimeve.
Be First to Comment