Debat mes dy vëllezërve përfundon në tragjedi, 28-vjeçari humb jetën në Turqi

Një ngjarje e rëndë ka tronditur qarkun Kula të Manisës në Turqi, ku një konflikt mes dy vëllezërve përfundoi me pasoja fatale.

Sipas raportimeve nga mediat turke, 28-vjeçari Hasan Akarsu dhe vëllai i tij 25-vjeçar U.C.A. u përfshinë në një debat për një arsye që ende nuk është bërë e ditur. Situata, e cila nisi si një përplasje verbale, u përshkallëzua shpejt dhe degjeneroi në dhunë fizike.

Gjatë konfliktit, 25-vjeçari dyshohet se e ka goditur me thikë vëllain e tij më të madh, duke e lënë të plagosur rëndë.

Pas alarmit të dhënë nga banorët, në vendngjarje mbërritën menjëherë ekipet e policisë dhe shërbimet e emergjencës. I plagosuri u transportua në Spitalin Shtetëror të Kulës dhe më pas u dërgua në një institucion tjetër shëndetësor për trajtim më të specializuar.

Pavarësisht ndërhyrjes së mjekëve, 28-vjeçari nuk arriti t’u mbijetojë plagëve dhe humbi jetën.

Policia ka arrestuar të dyshuarin pas ngjarjes, ndërsa autoritetet vijojnë hetimet për të zbardhur plotësisht rrethanat dhe motivin e konfliktit që çoi në këtë tragjedi familjare.