Tragjedia që i mori jetën pjesëtarit të NJRSH-së në Prizren, Shaban Hajdarit, ka prekur thellë opinionin publik dhe ka sjellë reagime të shumta në rrjetet sociale. Ndërkohë që autoritetet po vijojnë hetimet për të sqaruar rrethanat e ngjarjes së ndodhur në Morinë të Kukësit, në internet kanë qarkulluar komente dhe aludime të ndryshme.
Përmes një reagimi publik, mbesa e të ndjerit u ka bërë thirrje qytetarëve të ndalin spekulimet dhe të respektojnë dhimbjen e familjes në këtë periudhë zie.
“Në këto momente të rënda për familjen tonë, ju lutem të tregoni përgjegjësi në atë që shkruani dhe shpërndani. Çdo aludim apo informacion i pavërtetë vetëm sa e rëndon edhe më shumë dhimbjen që po përjetojmë,” është shprehur ajo.
Në reagimin e saj, ajo ka kërkuar që njerëzit të mos nxjerrin përfundime pa u zbardhur zyrtarisht rasti, duke theksuar se e vërteta duhet t’u lihet institucioneve kompetente.
Një pjesë të veçantë të mesazhit ia ka kushtuar bashkëshortes së Shaban Hajdarit, Gylgjanit, e cila, sipas saj, është bërë padrejtësisht objekt i komenteve fyese dhe gjykimeve në rrjetet sociale.
“Për familjen tonë, Gylgjani nuk ka qenë vetëm bashkëshortja e Shabanit, por një pjesë e pandashme e familjes sonë. Ajo ka qenë gjithmonë shembull i respektit, përkushtimit dhe mirësisë. Në këto momente ka nevojë për mbështetje dhe qetësi, jo për akuza apo komente që lëndojnë,” ka shkruar ajo.
Në fund, familja u bën apel të gjithë qytetarëve që të respektojnë kujtimin e Shaban Hajdarit dhe të shmangin përhapjen e spekulimeve, duke lënë në dorën e organeve kompetente zbardhjen e plotë të ngjarjes.
Be First to Comment