Një ngjarje e rëndë është regjistruar paraditen e së dielës në Janjevë, në komunën e Lipjanit, ku një 52-vjeçar është gjetur pa shenja jete në banesën e tij.
Viktima është identifikuar si Lulzim Gashi. Sipas informacioneve, familjarët kanë kërkuar ndihmën e shërbimeve emergjente rreth orës 09:30, pasi e kanë gjetur atë të shtrirë në shtëpi, pa shenja jete.
Ekipi i Emergjencës ka mbërritur menjëherë në vendin e ngjarjes, por mjeku kujdestar ka konstatuar vdekjen e 52-vjeçarit rreth orës 09:50.
Pas njoftimit, në vendngjarje kanë dalë njësitë e Policisë së Kosovës, të cilat kanë kryer veprimet e para hetimore dhe kanë siguruar zonën. Lidhur me rastin është informuar edhe Prokurori i Shtetit, i cili ka urdhëruar hapjen e rastit si “Trup i pajetë”.
Sipas familjarëve, i ndjeri kishte pasur probleme shëndetësore edhe më herët dhe nuk kanë ngritur dyshime se bëhet fjalë për vdekje të shkaktuar nga ndonjë veprim kriminal.
Duke u bazuar në të dhënat fillestare dhe në mungesë të elementeve që do të ngrinin dyshime për vdekje të dhunshme, prokurori ka vendosur që trupi të mos dërgohet për obduksion në Institutin e Mjekësisë Ligjore. Pas përfundimit të procedurave ligjore, trupi i pajetë i është dorëzuar familjes për ceremoninë mortore.
Autoritetet kanë bërë të ditur se rasti është trajtuar në përputhje me procedurat ligjore, ndërsa vdekja e Lulzim Gashit ka pikëlluar familjarët, miqtë dhe banorët e Janjevës, të cilët kanë shprehur ngushëllimet e tyre për humbjen e tij.
Be First to Comment