Pas 24 vitesh mister, vajza përqafon për herë të parë nënën e zhdukur (VIDEO)

Një ribashkim prekës u zhvillua para Gjykatës së Qarkut Rockingham në Karolinën e Veriut, ku Michele Hundley Smith, e cila ishte raportuar e zhdukur në vitin 2001, u takua me vajzën e saj pas më shumë se 24 vitesh.

 

Michele u paraqit në gjykatë për t’u përballur me një çështje ligjore të mbetur pezull që nga periudha para zhdukjes së saj. Në sallë ishte e pranishme edhe vajza e saj, Amanda Smith, e cila kishte ardhur për ta mbështetur. Momenti kur të dyja u afruan dhe u përqafuan u filmua dhe preku shumë njerëz.

 

“E di që jeta nuk është bardh e zi. Gjithmonë ekziston një zonë gri. Është shumë e shkurtër për të mbajtur mëri, sepse ajo është nëna ime”, u shpreh Amanda. “Kemi vetëm një jetë dhe unë dua që nëna ime të jetë pjesë e saj.”

 

Pas përfundimit të seancës gjyqësore, Michele dhe Amanda u larguan së bashku, duke hipur në të njëjtën makinë.

 

Michele ishte 38 vjeçe kur u raportua e zhdukur më 31 dhjetor 2001. Sipas bashkëshortit të saj, ajo ishte nisur më 9 dhjetor drejt një dyqani K-Mart në Martinsville të Virginias për të bërë blerjet e Krishtlindjeve, por nuk u kthye më në shtëpi.

 

Për më shumë se dy dekada, rasti mbeti pa zgjidhje. Vetëm në fund të muajit të kaluar, falë një informacioni të ri, autoritetet e gjetën Michele “gjallë dhe në gjendje të mirë” në Karolinën e Veriut. Me kërkesën e saj, vendndodhja nuk iu bë publike dhe familja u njoftua në mënyrë private.

 

Pak ditë pas identifikimit, Michele u arrestua pasi autoritetet zbuluan se ndaj saj ishte ende në fuqi një urdhër arresti i lëshuar në nëntor 2001 për drejtim automjeti nën ndikimin e alkoolit (DWI). Ajo nuk ishte paraqitur në gjykatë më 27 dhjetor të atij viti për këtë çështje.

 

Arsyet që e shtynë të largohej nga familja mbeten ende të paqarta. Pas seancës, Michele tha shkurt: “Ishte diçka personale. Në atë kohë po luftoja me demonët e mi dhe isha e humbur në mendimet e mia. Kisha arsyet e mia.”

 

Sherifi i Qarkut Rockingham, Sam Page, deklaroi se largimi i saj lidhej me probleme familjare, pa dhënë detaje të mëtejshme. Ai theksoi gjithashtu se hetimet nuk kanë gjetur prova që Michele të ketë qenë viktimë e ndonjë krimi gjatë gjithë periudhës së zhdukjes.

 

Edhe pse Michele është gjetur pas 24 vitesh, historia e saj vazhdon të ngrejë shumë pikëpyetje mbi atë që ndodhi gjatë gjithë kësaj kohe.