Ndryshime të reja për pensionet, qeveria pritet të prezantojë masat në shtator
Ministrja e Ekonomisë dhe Inovacionit, Delina Ibrahimaj, ka bërë të ditur se qeveria po përgatit ndryshime të reja në skemën e pensioneve, të cilat pritet të prezantohen gjatë muajit shtator.
Gjatë një deklarate për mediat, ministrja foli për situatën ekonomike në vend, nivelin e inflacionit dhe masat që mund të ndërmerren për mbështetjen e shtresave në nevojë. Sipas saj, pas indeksimit të pensioneve të kryer në muajin korrik, inflacioni aktual ndodhet rreth nivelit 3%, duke mos paraqitur një situatë të jashtëzakonshme për rritjen e çmimeve.
Megjithatë, Ibrahimaj theksoi se qeveria do të vijojë të monitorojë situatën dhe do të ndërhyjë me masa mbështetëse nëse do të jetë e nevojshme.
Një nga prioritetet kryesore të ministrisë është reforma e pensioneve. Sipas ministres, brenda shtatorit do të bëhen publike drejtimet dhe ndryshimet që pritet të aplikohen në skemën aktuale, me synim përmirësimin e saj.
Krahas pensioneve, qeveria po punon edhe për një ligj të ri për investimet strategjike. Ky kuadër i ri ligjor pritet të miratohet brenda këtij viti dhe synon përafrimin me standardet e Bashkimit Evropian, si dhe nxitjen e investimeve në zona me më pak zhvillim.
Sa i përket projektit të Zvërnecit, ministrja sqaroi se ende nuk ka një plan përfundimtar të miratuar, pasi puna vijon nga arkitektë dhe ekspertë të mjedisit. Ajo tha se investimi i parashikuar, me vlerë rreth 4 miliardë euro, do të kishte një ndikim të rëndësishëm në ekonominë e vendit.
Sipas saj, ky projekt shihet si një mundësi për zhvillim ekonomik dhe rritje të investimeve në Shqipëri.
Be First to Comment