Çmimet e naftës vijuan të bien për të katërtën ditë radhazi, ndërsa investitorët po analizojnë zhvillimet e fundit që mund të ndikojnë në furnizimin global me energji. Në fokus është situata rreth Ngushticës së Hormuzit, si dhe përshkallëzimi i konfliktit mes Rusisë dhe Ukrainës, i cili mund të ndikojë në prodhimin dhe eksportet ruse të naftës.
Nafta Brent u ul me 0.46%, duke zbritur në rreth 87.46 dollarë për fuçi. Në bilancin javor, rënia ka kaluar 7%. Edhe nafta amerikane WTI shënoi një tjetër rënie prej 0.46%, duke u tregtuar pranë nivelit 81.80 dollarë për fuçi.
Tregjet e nisën ditën e mërkurë me rritje, pas raportimeve se Rusia mund të përshkallëzojë luftën në Ukrainë. Megjithatë, kjo tendencë u përmbys pas lajmeve për një marrëveshje mes Iranit dhe Omanit lidhur me Ngushticën e Hormuzit, ku parashikohet edhe një mekanizëm për ndarjen e të ardhurave.
Presioni mbi çmimet është shtuar gjatë gjithë javës, ndërsa pritshmëritë për një marrëveshje mes Iranit dhe Omanit janë rritur. Në të njëjtën kohë, masat ekonomike të ndërmarra nga Shtetet e Bashkuara ndaj Teheranit dhe partnerëve të tij tregtarë u konsideruan më pak të ashpra nga sa kishte parashikuar tregu.
Pavarësisht rënies së ditëve të fundit, çmimet e naftës bruto mbeten më shumë se 40% mbi nivelin e fillimit të vitit. Konflikti që vijon prej gjashtë muajsh ka kufizuar ndjeshëm furnizimet energjetike nga rajoni i Gjirit Persik.
Sipas analistit të energjisë në MST Marquee, Sol Kavonic, tregu po reflekton gjithnjë e më shumë mundësinë e arritjes së një armëpushimi të ri. Bisedimet mes Omanit dhe Iranit shihen si një hap i mundshëm drejt një marrëveshjeje më të gjerë mes Teheranit dhe Uashingtonit.
Megjithatë, pasiguria mbetet e lartë. Përpjekjet e mëparshme për uljen e tensioneve kanë dështuar dhe investitorët kërkojnë prova konkrete se negociatat mund të çojnë në një marrëveshje të qëndrueshme.