Një valë moti të paqëndrueshëm pritet të përfshijë ditët në vijim disa vende të Europës Juglindore dhe rajonin e Mesdheut. Meteorologët paralajmërojnë për rrezik të shtuar nga stuhi të fuqishme, reshje intensive shiu, breshër dhe erëra me intensitet të lartë.
Sipas parashikimeve, zonat më të rrezikuara janë Italia jugore, Deti Jon dhe rajonet përreth, ku gjatë mbrëmjes dhe natës pritet të formohet një sistem i fuqishëm stuhish. Ky sistem atmosferik pritet të zhvendoset nga Europa Qendrore drejt Adriatikut dhe më pas në jug, duke ndikuar edhe në disa zona bregdetare.
Në hartën e zonave që mund të preken përfshihen edhe brigjet jugperëndimore të Shqipërisë, si dhe pjesë të Greqisë perëndimore. Në këto zona mund të regjistrohen reshje të dendura, breshër me përmasa të mëdha, erëra të forta dhe, në raste të izoluara, edhe fenomene si tornado, nëse krijohen kushte për zhvillimin e superqelizave stuhish.
Meteorologët theksojnë se rreziku është më i lartë përgjatë vijës bregdetare, ku temperaturat e larta të ujit në Detin Jon, të kombinuara me masat e lagështa ajrore, krijojnë kushte të favorshme për zhvillimin e stuhive të forta.
Një nivel më i ulët paralajmërimi është lëshuar edhe për pjesë të Sllovenisë, Kroacisë, Italisë verilindore dhe Adriatikut verior, ku priten reshje të shumta, erëra të forta dhe mundësi për breshër.
Paralajmërime për mot të paqëndrueshëm janë dhënë gjithashtu edhe për disa zona të Spanjës lindore dhe Rusisë jugperëndimore.
Sipas ekspertëve, kjo situatë është rezultat i përplasjes së masave shumë të nxehta dhe të lagështa të ajrit me një front të ftohtë atmosferik që po lëviz drejt Mesdheut. Temperaturat mbi normalen të ujërave të Detit Jon pritet të furnizojnë stuhitë me më shumë energji, duke rritur potencialin e tyre.
Autoritetet dhe qytetarët këshillohen të ndjekin me vëmendje përditësimet meteorologjike, pasi intensiteti dhe trajektorja e stuhive mund të ndryshojnë në një kohë të shkurtër.
Be First to Comment