Policia e Kosovës ka vënë në pranga të hënën në Ferizaj një person i cili ishte shpallur në kërkim ndërkombëtar përmes INTERPOL-it.
Sipas njoftimit zyrtar, ndaj të arrestuarit autoritetet e Maqedonisë së Veriut kishin lëshuar një urdhërarrest ndërkombëtar.
Operacioni është zhvilluar rreth orës 21:00 nga zyrtarët e Drejtorisë për Bashkëpunim Ndërkombëtar Policor, në bashkëpunim me njësitë e tjera të Policisë së Kosovës, përfshirë edhe zyrtarët e Stacionit Policor në Ferizaj.
Arrestimi është pjesë e procedurave të bashkëpunimit ndërkombëtar mes autoriteteve policore të dy vendeve.
Deri tani nuk janë bërë publike detaje të tjera lidhur me veprën për të cilën personi ishte në kërkim apo hapat që do të ndërmerren pas arrestimit. Autoritetet pritet të vijojnë procedurat përkatëse në përputhje me kërkesën ndërkombëtare të drejtësisë.