Në mbledhjen e Këshillit Kombëtar të Partisë Demokratike, Sali Berisha deklaroi se PD do të vijojë betejën e saj politike për rikthimin e votës së lirë dhe realizimin e rotacionit politik.
Në fjalën e tij, Berisha e cilësoi PD-në si një forcë politike të pamposhtur, duke theksuar se gjatë tre viteve të fundit partia ka zhvilluar mbi 400 protesta dhe qindra aksione politike kundër qeverisë.
Ai tha se situata politike në vend mbetet e tensionuar dhe vlerësoi qytetarët që vijojnë protestat në Tiranë. Sipas tij, këto protesta përfaqësojnë një përballje për atë që e cilësoi si “kauzën më të drejtë” të shqiptarëve.
Berisha theksoi gjithashtu se PD do të vazhdojë përpjekjet për rikthimin e votës së lirë dhe marrjen e pushtetit përmes një rotacioni politik. Ai nënvizoi se opozita, sipas tij, ka denoncuar në arenën ndërkombëtare problematikat që lidhen me procesin zgjedhor në Shqipëri.