Çmimet e naftës kanë shënuar një tjetër rritje në tregjet ndërkombëtare, të ndikuara nga tensionet në Lindjen e Mesme dhe pasiguritë për furnizimin global me karburante. Situata mes Shteteve të Bashkuara dhe Iranit, si edhe shqetësimet për qarkullimin në Ngushticën e Hormuzit, kanë ushtruar presion mbi tregjet.
Nafta Brent po tregtohet pranë 85 dollarëve për fuçi, ndërsa nafta WTI rreth 80 dollarë për fuçi, nivelet më të larta të javëve të fundit. Në rritjen e çmimeve kanë ndikuar edhe kufizimet në eksportet ruse të karburanteve.
Efektet janë ndjerë edhe në Shqipëri, ku çmimi i naftës në pikat e shitjes me pakicë ka arritur në 196–198 lekë për litër, duke e renditur vendin ndër më të shtrenjtët në rajon për sa i përket karburanteve.
Operatorët e tregut bëjnë të ditur se rritja lidhet me shtrenjtimin e treguesit ndërkombëtar Platts, i cili është rritur ndjeshëm krahasuar me fundin e muajit qershor. Në çmimin final ndikojnë gjithashtu kostot e transportit, sigurimit dhe taksat.
Sipas ekspertëve, një nga faktorët kryesorë që mban çmimet e karburanteve të larta në Shqipëri është niveli i lartë i taksave, të cilat përbëjnë një pjesë të konsiderueshme të çmimit përfundimtar. Mes tyre përfshihen akciza, taksa e qarkullimit, taksa e karbonit dhe TVSH-ja.
Ndërkohë, vendet fqinje vijojnë të kenë çmime më të ulëta. Serbia ka ndërmarrë masa për të kufizuar ndikimin e rritjes së çmimeve, ndërsa Maqedonia e Veriut, Mali i Zi dhe Kosova vazhdojnë të ofrojnë karburante me kosto më të favorshme.
Ekspertët paralajmërojnë se, nëse tensionet gjeopolitike vazhdojnë dhe furnizimet globale mbeten të kufizuara, çmimet e naftës mund të qëndrojnë në nivele të larta edhe në javët e ardhshme.
Be First to Comment