Kreu i Inspektoratit të Mbrojtjes së Territorit në Durrës, Ilir Ngresi, ka dhënë dorëheqjen nga detyra pas një takimi me kryetaren e bashkisë, Emiriana Sako.
Largimi i tij vjen në një moment delikat për IMT-në, e cila është përfshirë në një aksion të gjerë për shembjen e ndërtimeve të ngritura mbi kanalet kulluese—një ndërhyrje e rëndësishme për zgjidhjen e problemeve të kahershme që prekin qytetin dhe banorët e tij.
Sipas burimeve pranë bashkisë, dorëheqja lidhet me presionin e lartë dhe ngarkesën e madhe që shoqëron këtë post, ku përplasen interesa të ndryshme dhe vendimmarrjet shpesh sjellin tensione me qytetarët. Ekspozimi i vazhdueshëm ndaj situatave të vështira në terren mendohet se ka ndikuar në vendimin për t’u tërhequr.
Gjatë muajve të fundit, Ngresi u përball edhe me reagime të forta publike. Në shkurt, ai u kritikua nga banorët e zonës historike të Durrësit për rolin e tij në procesin e njoftimeve për lirimin e banesave në kuadër të projektit TID Durrës.
Dorëheqja e tij vjen pas një periudhe të shkurtër në detyrë, ndërsa mbetet ende e paqartë se kush do ta pasojë në krye të IMT Durrës, në një kohë kur aksionet për lirimin e hapësirave publike vazhdojnë.