Tradhtia që shkatërroi një familje – 40-vjeçari zbulon si e mësoi të vërtetën
Një 40-vjeçar nga Tirana ka ndarë historinë e tij në emisionin “Fol me Psikologen”, ku rrëfeu se si dyshimet për tradhtinë e bashkëshortes u kthyen në një realitet të dhimbshëm.
Sipas tij, gjithçka nisi kur vuri re ndryshime të mëdha në sjelljen e gruas. Ajo ndryshoi rutinën e përditshme, garderobën, parfumet, oraret e kthimit në shtëpi dhe nisi të shoqërohej me njerëz të rinj. Përveç kësaj, marrëdhënia me fëmijët dhe komunikimi në familje u ftohën ndjeshëm.
Një episod i veçantë e bëri të dyshonte edhe më shumë. Bashkëshortja i shkroi se nuk mund t’i merrte fëmijët nga shkolla, ndaj ai u largua më herët nga puna për t’i marrë vetë. Kur ajo u kthye në shtëpi, sipas tij, reagoi me nervozizëm dhe nisi një debat pa ndonjë arsye të qartë.
Pa pasur prova konkrete, 40-vjeçari vendosi të kërkonte ndihmën e një detektivi privat. Pas disa ditësh vëzhgimi, ai mori konfirmimin e asaj që kishte dyshuar prej kohësh.
Ai tregoi se momenti kur mësoi të vërtetën ishte një nga më të vështirët e jetës së tij, por edhe një çast që i dha fund pasigurisë. Më pas, çështja përfundoi në gjykatë, ku u trajtuan edhe aspektet ligjore që lidhen me kujdestarinë e fëmijëve.
Në të njëjtin emision, drejtori i Institutit të Detektivëve Privatë, Ndue Pjetra, shpjegoi se rastet e dyshuara për tradhti zakonisht verifikohen brenda pak ditësh, ndërsa theksoi se disa raste janë më të vështira për t’u dokumentuar, veçanërisht kur bëhet fjalë për persona me profil publik.
Gjatë diskutimit, psikologët u ndalën edhe te ndikimi që tradhtia bashkëshortore mund të ketë në marrëdhënien e çiftit, në stabilitetin e familjes dhe, mbi të gjitha, te mirëqenia emocionale e fëmijëve.
Be First to Comment