Një deklaratë e pazakontë nga zyrtarë iranianë ka tërhequr vëmendjen në rrjet, duke nxitur interpretime të ndryshme në lidhje me mesazhin e saj politik.
“Përse duhet ta godasim Italinë? Ne e duam popullin italian, futbollin, ushqimin. Duam Romën, Koloseun, Riminin, Pisën, Milanon, Napolin, Siçilinë dhe gjithçka që është mes tyre”, thuhet në reagimin e bërë publik.
Deklarata vjen si përgjigje ndaj komenteve të presidentit amerikan Donald Trump, i cili në një intervistë për gazetën italiane Corriere della Sera u shpreh se Irani zotëron armë bërthamore të afta të godasin Italinë brenda pak minutash.
Sipas raportimeve, reagimi është publikuar nga ambasada iraniane në Tajlandë përmes një postimi në platformën X. Ndërsa në dukje thekson admirimin për Italinë, media italiane sugjeron se mesazhi mund të ketë edhe një dimension strategjik.
Analistët vlerësojnë se kjo mund të jetë pjesë e një përpjekjeje për të ndikuar në opinionin publik europian dhe për të thelluar ndasitë brenda Bashkimit Europian, në një moment të ndjeshëm për rajonin.
Ndërkohë, Donald Trump ka kritikuar më herët kryeministren italiane Giorgia Meloni, duke shprehur pakënaqësi për qëndrimin e saj ndaj përfshirjes në një konflikt të mundshëm me Iranin. Ai gjithashtu pati përplasje me të edhe për çështje që lidhen me qëndrimet ndaj Vatikanit.
Meloni, e cila drejton Italinë që nga tetori i vitit 2022, konsiderohet një nga aleatet më të afërta të Trump në Europë, duke u përpjekur shpesh të luajë rolin e ndërmjetëses mes SHBA-së dhe partnerëve europianë.