Protesta e opozitës, e cila do të zhvillohet të premten para Kryeministrisë, është parashikuar të nisë në orën 19:00. Në kuadër të saj, Policia e Tiranës ka ndërmarrë një sërë masash për garantimin e rendit dhe sigurisë.
Sipas njoftimit zyrtar, ndalohet parkimi i automjeteve në bulevardin “Dëshmorët e Kombit”, nga zona e njohur si “Ura e Dajtit” deri në rrugën “Ismail Qemali”, deri në përfundim të tubimit.
Ndërkohë, nga ora 15:00 e pasdites deri në përfundim të protestës, do të bllokohet qarkullimi i automjeteve në disa akse kryesore. Konkretisht, do të ndalohet lëvizja në bulevardin “Dëshmorët e Kombit”, nga kryqëzimi pranë Ministrisë së Brendshme deri në sheshin “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia bën me dije se, në varësi të zhvillimit të protestës, mund të ketë kufizime të përkohshme edhe në rrugë të tjera. Në rast bllokimesh, qarkullimi do të devijohet në akse alternative.
Autoritetet u bëjnë apel qytetarëve të shmangin lëvizjen me automjete në zonat e prekura, për të lehtësuar qarkullimin dhe për të mos penguar zhvillimin e tubimit.
Gjithashtu, Policia e Tiranës u kërkon qytetarëve të distancohen nga çdo veprim i kundërligjshëm që mund të cenojë rendin dhe sigurinë publike.