Ka ndërruar jetë Vera Guri, nëna e katër fëmijëve, e cila prej rreth 10 ditësh ishte duke luftuar për jetën në repartin e reanimacionit pas një aksidenti të rëndë rrugor në Shkodër.
Aksidenti ndodhi pranë ish-fabrikës së miellit, teksa ajo po udhëtonte me biçikletë në rrugën e kthimit nga puna. Sipas informacioneve paraprake, gruaja u përplas nga një automjet që dyshohet se po lëvizte me shpejtësi të lartë brenda zonës urbane.
Megjithëse mori ndihmë të specializuar mjekësore, dëmtimet e pësuara rezultuan fatale dhe ajo nuk arriti t’u mbijetojë plagëve.
Tragjedia bëhet edhe më e rëndë për familjen e saj, pasi vetëm një vit më parë Vera Guri kishte humbur edhe bashkëshortin, duke lënë pas katër fëmijë që tashmë përballen me një humbje të dyfishtë.
Ndërkohë, autoritetet vijojnë hetimet për zbardhjen e plotë të rrethanave të aksidentit, ndërsa drejtuesi i automjetit të përfshirë në ngjarje nuk është identifikuar ende.