Ka nisur numërimi i votave të diasporës në QNR
Komisioni Qendror i Zgjedhjeve (KQZ) ka bërë të ditur se procesi i numërimit të votave po vazhdon në Qendrat Komunale të Numërimit dhe në Qendrën e Numërimit dhe Rezultateve (QNR), në kuadër të zgjedhjeve të parakohshme për Kuvendin e Kosovës, të mbajtura më 7 qershor 2026.
Zëdhënësi i KQZ-së, Valmir Elezi, njoftoi se në QNR ka filluar numërimi i votave të qytetarëve që kanë votuar në përfaqësitë diplomatike të Kosovës jashtë vendit.
Sipas tij, më 6 qershor votimi është organizuar në 30 përfaqësi diplomatike të Kosovës, të shpërndara në 18 shtete të ndryshme. Nga 27,724 qytetarë të regjistruar për të votuar fizikisht në këto misione diplomatike, të drejtën e votës e kanë shfrytëzuar 22,860 persona, që përbën 82.46 për qind të pjesëmarrjes.
Ndërkohë, në QNR po vazhdon edhe verifikimi i pakove me fletëvotime të ardhura përmes postës nga votuesit jashtë Kosovës. Ky proces ka për qëllim të konfirmojë nëse dërgesat janë bërë nga votues të regjistruar për votim me postë dhe nëse i plotësojnë kriteret për t’u përfshirë në numërim.
KQZ ka theksuar se të gjitha procedurat po zhvillohen sipas afateve dhe standardeve të përcaktuara për administrimin e procesit zgjedhor.