Franca përshpejton rritjen e pagës minimale, 1,502 euro neto nga 1 dhjetori
PARIS – Qeveria franceze ka njoftuar rritjen e pagës minimale (SMIC) me 1.6%, një masë që do të hyjë në fuqi më 1 dhjetor, një muaj më herët nga sa ishte planifikuar fillimisht.
Vendimi vjen në një kohë kur qytetarët po përballen me rritjen e kostos së jetesës, ndërsa pakënaqësitë sociale dhe kërkesat për paga më të larta po shtohen në vend.
Pas këtij ndryshimi, paga minimale neto mujore në Francë do të arrijë në 1,502 euro, krahasuar me 1,477.93 euro që është aktualisht. Ministri i Punës, Jean-Pierre Farandou, konfirmoi se qeveria ka vendosur të zbatojë më herët rritjen automatike prej 1.6%, e cila ishte parashikuar për 1 janar.
Kryeministri Sébastien Lecornu e përshkroi këtë vendim si rritjen e dytë më të madhe të pagës minimale në dy dekadat e fundit. Sipas tij, synimi është përmirësimi i gjendjes financiare të punonjësve me të ardhura të ulëta, duke shmangur ndikimet negative në tregun e punës.
Por masa nuk është pritur me entuziazëm nga sindikatat. Kreu i Konfederatës së Përgjithshme të Punës (CGT), Sophie Binet, e cilësoi rritjen si të pamjaftueshme dhe shumë larg pritshmërive të punonjësve.
“Ne nuk erdhëm këtu për të lypur lëmoshë”, u shpreh Binet, duke paralajmëruar protesta të tjera më 17 nëntor.
Rritja e pagës minimale vjen në një periudhë të ndjeshme politike për Francën, vetëm pesë muaj përpara zgjedhjeve presidenciale. Çështjet e fuqisë blerëse, pagave dhe shpenzimeve familjare vazhdojnë të jenë në qendër të debatit publik.
Megjithëse qeveria e konsideron këtë vendim një hap drejt mbështetjes së shtresave me të ardhura të ulëta, reagimet e sindikatave tregojnë se kërkesat për rritje më të ndjeshme të pagave dhe përmirësim të kushteve ekonomike mbeten ende të forta.
