Instituti Hidrometeorologjik i Kosovës (IHMK) ka bërë të ditur parashikimin e motit për fundjavën e 29 dhe 30 gushtit. Moti pritet të karakterizohet nga temperatura të larta, ndërsa gjatë së shtunës nuk përjashtohen reshjet lokale të shiut dhe shkarkimet atmosferike.
E shtuna do të nisë me mot kryesisht me diell dhe vranësira të herëpashershme. Gjatë ditës, vranësirat do të shtohen dhe mund të zhvillohen vranësira konvektive, të cilat lokalisht mund të sjellin reshje shiu dhe bubullima.
Reshjet pritet të jenë kryesisht afatshkurtra, ndërsa në zonat ku zhvillohen vranësira të dendura mund të ketë edhe erëra të përforcuara përkohësisht.
Temperaturat minimale të së shtunës do të lëvizin nga 12 deri në 17 gradë Celsius, ndërsa ato maksimale pritet të arrijnë nga 28 deri në 34 gradë Celsius. Era do të fryjë kryesisht nga veriu dhe veriperëndimi, me shpejtësi 1–8 m/s.
E diela, 30 gusht, pritet të sjellë mot kryesisht të kthjellët, me diell dhe temperatura të larta. Vranësira të pakta deri në mesatare mund të paraqiten kryesisht në zonat malore.
Temperaturat minimale do të variojnë nga 12 deri në 16 gradë Celsius, ndërsa maksimalet nga 29 deri në 33 gradë Celsius. Era do të fryjë nga veriu dhe veriperëndimi, me shpejtësi 1–4 m/s.
Sipas IHMK-së, moti i ngrohtë dhe temperaturat e larta pritet të vijojnë edhe në ditët e para të shtatorit.