Irani ka konfirmuar zgjatjen e armëpushimit me Shtetet e Bashkuara, duke lënë njëkohësisht të hapur mundësinë për lëvizje diplomatike në të ardhmen, pa u angazhuar për rifillimin e menjëhershëm të bisedimeve.
Zëdhënësi i Ministrisë së Jashtme iraniane, Esmail Baghai, në një deklaratë të transmetuar nga televizioni shtetëror, shmangu dhënien e një përgjigjeje të qartë nëse Teherani është i gatshëm të marrë pjesë në një raund të ri negociatash me Uashingtonin, të cilat pritet të zhvillohen në Islamabad.
“Diplomacia është një mjet për të mbrojtur interesat dhe sigurinë kombëtare. Sa herë që vlerësojmë se ekzistojnë kushte të përshtatshme për ta përdorur këtë mjet në funksion të objektivave tona, do të veprojmë në përputhje me rrethanat”, deklaroi ai.
Ky qëndrim sugjeron se Irani po mban të hapura kanalet e komunikimit, por pa dhënë sinjale për një rikthim të shpejtë në tryezën e bisedimeve.
Ndërkohë, burime diplomatike në Teheran theksojnë se një nga kushtet kryesore për rifillimin e negociatave mbetet heqja e sanksioneve amerikane, veçanërisht atyre që prekin portet iraniane.
“Ne nuk do të negociojmë nën presion apo kërcënime”, citohet të kenë deklaruar diplomatët iranianë.
Sipas tyre, kontaktet me ndërmjetës nga Pakistani janë duke vazhduar, me synimin për të krijuar kushtet e nevojshme për një rikthim eventual në procesin e negociatave.