Deklaratat e ish-kryetares së Kuvendit, Elisa Spiropali, për nevojën e një procesi vetëpastrimi në radhët e Partisë Socialiste kanë ngjallur reagime brenda kësaj force politike.
Spiropali i bëri thirrje kryeministrit Edi Rama që të ndërmarrë reforma të brendshme dhe të largojë nga partia individët që, sipas saj, dëmtojnë imazhin dhe funksionimin e saj.
Ndaj këtyre deklaratave ka reaguar kryetarja e PS-së në Shkodër, Mirela Dodaj, e cila ka vlerësuar se një proces i tillë duhet të nisë nga vetë ata që kanë qenë pjesë e strukturave drejtuese të partisë ndër vite.
Sipas Dodajt, Spiropali ka qenë për një kohë të gjatë ndër figurat më të rëndësishme dhe më me ndikim në Partinë Socialiste, ndaj, sipas saj, është e vështirë të ndahen përgjegjësitë për zhvillimet e së kaluarës.
“Nëse vërtet duhet të ketë një proces vetëpastrimi në Partinë Socialiste, ai duhet të nisë nga secili prej nesh, veçanërisht nga ata që kanë qenë pjesë e vendimmarrjes për vite me radhë. Para se të kërkohen llogari nga të tjerët, duhet të jepen llogari për rolin dhe përgjegjësitë personale”, është shprehur Dodaj.
Ajo theksoi gjithashtu mbështetjen e saj për qeverinë dhe reformat e ndërmarra nga Rama, duke shtuar se askush nuk duhet të paraqitet si kritik i proceseve ku ka qenë vetë pjesë aktive.
Be First to Comment