Pensionistët marrin bonus të dyfishuar nga 1 janari 2027, vijon edhe indeksimi
Nga 1 janari 2027, pensionistët pritet të përfitojnë një bonus mujor të dyfishuar, ndërsa paralelisht do të vijojë edhe indeksimi i pensioneve.
Lajmi është bërë i ditur nga ministrja e Ekonomisë dhe Financave, Delina Ibrahimaj, e cila deklaroi se rritja e të ardhurave të pensionistëve mbetet një nga prioritetet e politikave sociale të qeverisë.
Sipas saj, bonusi mujor i nisur gjatë vitit 2026 do të dyfishohet nga fillimi i vitit të ardhshëm dhe do të aplikohet për të gjitha kategoritë e pensionistëve.
Për këtë mbështetje, në buxhetin e vitit 2027 janë parashikuar 22.4 miliardë lekë shtesë. Ndërkohë, objektivi i qeverisë është që deri në vitin 2030 pensioni i plotë të arrijë të paktën 40 mijë lekë, ndërsa pensioni i pjesshëm të jetë jo më pak se 22 mijë lekë.
“Pensionistët janë në qendër të politikave tona sociale dhe rritja e të ardhurave të tyre mbetet një nga prioritetet tona. Në vitin 2026 nisëm bonusin mujor, ndërsa nga 1 janari 2027 ai do të dyfishohet për të gjitha kategoritë e pensionistëve, krahas vijimit të indeksimit të pensioneve”, deklaroi Ibrahimaj.
Sipas ministres, masat synojnë një rritje graduale të të ardhurave mujore të pensionistëve, përmes kombinimit të bonusit dhe indeksimit të pensioneve.