Lëvizje e rëndësishme në Kryeministri: Ndryshon shefja e kabinetit të Edi Ramës
Një ndryshim i rëndësishëm është regjistruar në strukturat e Kryeministrisë, pasi Vali Bizhga ka vendosur të largohet nga detyra e shefes së kabinetit të kryeministrit Edi Rama, një pozicion që e mbajti për shumë vite.
Bizhga ka qenë një nga bashkëpunëtoret më të afërta të Ramës që prej periudhës kur ai drejtonte Bashkinë e Tiranës, duke vijuar më pas të kishte një rol kyç edhe në organizimin dhe koordinimin e punës së kabinetit qeveritar. Edhe pse rrallëherë në qendër të vëmendjes publike, ajo konsiderohej një figurë me ndikim në administratën e Kryeministrisë.
Sipas burimeve pranë qeverisë, arsyeja e largimit lidhet me çështje shëndetësore, të cilat e kanë bërë të pamundur vazhdimin e angazhimeve të saj në ritmin intensiv që kërkon ky funksion.
Pas dorëheqjes së Bizhgës, vëmendja është përqendruar te emri që do ta pasojë në një nga postet më të rëndësishme të kabinetit të kryeministrit.
Burime për BalkanWeb dhe News24 bëjnë me dije se këtë detyrë pritet ta marrë Vilma Premti, e cila deri së fundmi shërbente si shefe e kabinetit të kryetares së Gjykatës Kushtetuese, Olta Zaçaj.
Premti njihet si një administratore me përvojë dhe me njohje të mirë të funksionimit të institucioneve shtetërore. Emërimi i saj pritet të zyrtarizohet në ditët në vijim, duke shënuar nisjen e një etape të re në drejtimin e kabinetit të Kryeministrisë.
Be First to Comment