Greqia ndryshon rregullat për migracionin e ligjshëm
Një projektligj i ri i Ministrisë së Migracionit dhe Azilit në Greqi parashikon ndryshime në procedurat për dhënien dhe rinovimin e lejeve të qëndrimit, me synim reduktimin e burokracisë dhe përshpejtimin e procedurave për emigrantët që qëndrojnë ligjërisht në vend.
Projektligji pritet të paraqitet në Komisionin përkatës të Parlamentit grek dhe vjen në një kohë kur çështja e migracionit është rikthyer në qendër të debatit në Greqi dhe në Bashkimin Evropian.
Sipas të dhënave të cituara në raportim, në Greqi jetojnë rreth 793 mijë emigrantë me status të rregullt, ndërsa rreth 293 mijë aplikime për leje qëndrimi janë ende në pritje të shqyrtimit. Ministria synon që me rregullimet e reja të zhbllokojë fillimisht rreth 90 mijë raste.
Çfarë ndryshon për emigrantët?
Një nga masat e propozuara është rinovimi automatik i disa kategorive të lejeve të qëndrimit, veçanërisht për personat që vazhdojnë të punojnë te i njëjti punëdhënës.
Projektligji parashikon gjithashtu që lejet e reja të kenë një kohëzgjatje minimale prej dy vitesh, me qëllim që vonesat administrative të mos ndikojnë në statusin e qëndrimit të emigrantëve.
Një mundësi e veçantë parashikohet për personat që kanë jetuar ligjërisht në Greqi për të paktën pesë vite dhe aplikimet e të cilëve janë refuzuar më parë për arsye procedurale. Ata do të mund të riaplikojnë pasi të korrigjojnë mangësitë e evidentuara.
Ndryshime parashikohen edhe për emigrantët mbi 65 vjeç, të cilët kanë jetuar dhe punuar ligjërisht në Greqi për të paktën 20 vite. Sipas projektligjit, ata mund të qëndrojnë në vend pa detyrim për të punuar, nëse plotësojnë kushtet e parashikuara për sigurimin shëndetësor dhe pensionin.
Lehtësime për punëtorët nga vendet e treta
Projektligji synon gjithashtu të përshpejtojë procedurat për sjelljen e punëtorëve nga vendet e treta, veçanërisht në sektorët ku ka mungesë të fuqisë punëtore.
Procedurat për punësimin përmes kompanive të punësimit të përkohshëm pritet të thjeshtohen, ndërsa për projekte të mëdha parashikohet mundësia e thirrjes së menjëhershme të deri në 500 punëtorëve.
Një tjetër ndryshim është mundësia që punëtorët e ardhur përmes procedurës zyrtare të ndryshojnë punëdhënësin, pa humbur statusin e tyre të ligjshëm të qëndrimit.
Në kuadër të politikave të reja për fuqinë punëtore, Greqia synon gjithashtu të forcojë marrëveshjet me disa vende të treta, përfshirë Filipinet, Armeninë dhe Egjiptin, veçanërisht për sektorë si bujqësia.
Ministri i Migracionit dhe Azilit, Thanos Plevris, ka deklaruar se synimi është krijimi i procedurave më të shpejta për emigrantët që qëndrojnë dhe punojnë ligjërisht në Greqi, ndërsa qeveria do të vazhdojë politikën e saj kundër migracionit të paligjshëm.