Kryeministri i Shqipërisë, Edi Rama, ka shprehur ngushëllimet e tij për ndarjen nga jeta të ish-volejbollistit dhe trajnerit të shquar shqiptar, Kreshnik Tartari, një prej figurave më të rëndësishme në historinë e volejbollit shqiptar.
Përmes një mesazhi të publikuar në rrjetet sociale, Rama vlerësoi kontributin e jashtëzakonshëm të Tartarit në sportin shqiptar, duke e cilësuar atë si një legjendë të volejbollit dhe një trajner që formoi breza kampionesh.
“Lamtumirë miku im i dashur. U prehsh në paqe, Kreshnik Tartari, legjendë e sportit shqiptar, kampion dhe krijues kampionesh që përfaqësuan me krenari Shqipërinë në arenën europiane të volejbollit të femrave, në një kohë kur Europa dukej shumë larg”, shkroi Rama.
Kreshnik Tartari u nda nga jeta në moshën 83-vjeçare. I lindur më 21 korrik 1943 në Tiranë, ai ia kushtoi mbi pesë dekada të jetës së tij sportit, duke ndërtuar një karrierë të pasur si sportist, trajner dhe drejtues.
Gjatë rrugëtimit të tij profesional, Tartari zhvilloi mbi 2 mijë ndeshje zyrtare dhe kontribuoi ndjeshëm në sukseset e ekipit “Dinamo” dhe të Kombëtares shqiptare. Përkushtimi, profesionalizmi dhe rezultatet e arritura e shndërruan atë në një nga emrat më të respektuar dhe më emblematikë të volejbollit shqiptar.
Ndarja e tij nga jeta përbën një humbje të madhe për sportin shqiptar, ndërsa kujtimi dhe trashëgimia që ai lë pas do të mbeten të gjalla për brezat e ardhshëm të sportistëve dhe tifozëve.