Ideja e Besnik Tahirit për zgjedhjen e presidentit përmes dy kandidatëve – një nga Vetëvendosja dhe një nga ish-opozita – është mirëpritur nga përfaqësues të VV-së. Sipas deputetit Adnan Rrustemi, një skenar i tillë do të ndihmonte në sigurimin e kuorumit të nevojshëm për votim.
Në Lëvizjen Vetëvendosje është përmendur si opsion një garë mes kandidatit të partisë fituese dhe një kandidati të përbashkët të ish-opozitës, me qëllim tejkalimin e ngërçit institucional.
Rrustemi theksoi se presidenti është përgjegjësi e të gjithë deputetëve dhe se ekzistojnë mënyra për të shmangur bllokadat politike, nëse ka vullnet.
Nga ana tjetër, në LDK është konfirmuar se kandidatja e tyre për president mbetet Vjosa Osmani, duke mos pranuar ndryshime në qëndrimin e partisë.
Edhe Aleanca për Ardhmërinë e Kosovës ka përmendur si zgjidhje të mundshme bashkimin e ish-opozitës rreth një kandidati të përbashkët, për të rritur shanset për zgjedhjen e presidentit.
Ndërkohë, janë bërë thirrje nga disa deputetë që partitë politike të arrijnë një marrëveshje më gjithëpërfshirëse për të shmangur bllokada të reja institucionale dhe për të garantuar funksionimin normal të institucioneve të vendit.
Be First to Comment