Mandi i Nishtullës rrëfen për jetën private: “Jam baba i 9 fëmijëve, kjo është pasuria ime më e madhe”
Këngëtari i njohur Mandi i Nishtullës ka bërë një rrëfim të rrallë dhe mjaft emocional, duke folur hapur jo vetëm për karrierën e tij muzikore, por edhe për periudha të vështira të jetës private.
Gjatë intervistës, Mandi ka treguar me emocione se në një periudhë të jetës së tij ka qenë i varur nga lëndët narkotike dhe se kjo varësi kishte ndikuar edhe në pasionin e tij për muzikën.
Ai ka rrëfyer se në atë periudhë mbështetjen më të madhe e kishte gjetur te babai i tij, i cili e kishte ndihmuar të kalonte atë fazë të vështirë. Këngëtari gjithashtu u ka bërë apel personave që përballen me varësinë që të kërkojnë ndihmë dhe të heqin dorë nga droga.
Në një tjetër pjesë të intervistës, Mandi ka folur për familjen e tij dhe ka zbuluar se është baba i 9 fëmijëve, duke e cilësuar familjen si pasurinë më të madhe që ka.
“Pasuria ime e vërtetë janë fëmijët e mi. Unë kam tre vajza dhe gjashtë djem. Zoti më ka dhënë një bekim të madh”, ka treguar ai.
Mandi ka bërë të ditur gjithashtu se fëmijët e tij janë nga më shumë se një martesë, duke folur hapur për jetën e tij familjare.
Rrëfimi i tij në emisionin “D-Night” ka tërhequr vëmendjen e publikut, veçanërisht për sinqeritetin me të cilin këngëtari foli për të kaluarën, vështirësitë personale dhe familjen e tij.