Mot i paqëndrueshëm në ditët në vijim, fundjava sjell kthimin e vapës
Ndërsa Evropa Perëndimore po përgatitet të përballet me valën e dytë të të nxehtit këtë javë, me temperatura që në disa zona të Spanjës dhe Francës mund t’i afrohen sërish 40°C, vendi ynë do të mbetet nën ndikimin e kushteve më të paqëndrueshme atmosferike.
E hëna ka nisur me mot kryesisht të kthjellët dhe vranësira të pakta, por gjatë orëve të vona të pasdites nuk përjashtohen reshje të izoluara në pjesët veriore dhe verilindore. Kjo situatë lidhet me depërtimin e masave më të freskëta dhe të lagështa ajrore që po ndikojnë në Evropën Qendrore dhe një pjesë të Ballkanit.
Gjatë ditëve në vijim, këto masa do të vazhdojnë të ndikojnë edhe në territorin tonë, duke sjellë vranësira më të shpeshta, reshje lokale dhe një rënie të lehtë të temperaturave, veçanërisht në zonat ku do të ketë zhvillime të motit.
Të martën pritet mot me alternime kthjellimesh dhe vranësirash, ndërsa pasditja mund të sjellë rrebeshe lokale shiu, të shoqëruara në disa zona me breshër dhe shkarkesa rrufesh.
Edhe e mërkura do të karakterizohet nga mot i ngjashëm. Gjatë pasdites pritet depërtimi i një mase më të freskët ajrore, e cila mund të shkaktojë rrebeshe shiu, vetëtima dhe breshër të vogël. Në disa rajone këto fenomene mund të marrin formën e stuhive të shkurtra, por intensive.
Të enjten moti mbetet i ndryshueshëm, me periudha me diell dhe vranësira, si dhe me mundësi për reshje lokale dhe shkarkesa elektrike.
Sipas parashikimeve aktuale, nga e premtja dhe gjatë fundjavës pritet stabilizim i motit. Dielli do të dominojë në pjesën më të madhe të vendit, ndërsa temperaturat do të shënojnë rritje graduale.
Era do të fryjë kryesisht nga veriu, me intensitet të ndryshueshëm. Në zonat ku do të zhvillohen stuhi lokale, ajo mund të arrijë shpejtësi prej 20 deri në 70 km/h.
Temperaturat minimale do të luhaten nga 11 deri në 17°C, ndërsa maksimalet do të variojnë nga 25 deri në 32°C.
