Ulen çmimet e benzinës në Maqedoninë e Veriut, ja sa do të kushtojnë karburantet nga mesnata
Komisioni Rregullator për Energjetikë, Shërbime Ujore dhe Shërbime të Menaxhimit të Mbeturinave Komunale (KRRE) ka miratuar vendimin e ri për çmimet e derivateve të naftës në Maqedoninë e Veriut.
Sipas vendimit, çmimet me pakicë të karburanteve do të ulen mesatarisht me 1,89% krahasuar me vendimin e datës 19 tetor 2026. Çmimet e reja do të hyjnë në fuqi më 27 tetor, nga ora 00:01.
Ulja më e madhe do të jetë te benzinat, ndërsa çmimi i dizelit do të mbetet i pandryshuar.
Çmimet e reja të karburanteve
Sipas vendimit të KRRE-së, çmimet maksimale do të jenë:
- EUROSUPER BS-95: 91 denarë për litër
- EUROSUPER BS-98: 93 denarë për litër
- EURODIZEL BS (D-E V): 99 denarë për litër
- Vaji ekstra i lehtë EL-1: 110 denarë për litër
- Mazuti M-1 NS: 54,273 denarë për kilogram
Sa do të ulen çmimet?
Çmimet e të dy llojeve të benzinës, EUROSUPER BS-95 dhe EUROSUPER BS-98, do të ulen me nga 5 denarë për litër.
Ndërkohë, çmimi i dizelit EURODIZEL BS nuk do të pësojë ndryshime dhe do të vazhdojë të shitet me 99 denarë për litër.
Ulja do të prekë edhe vajin ekstra të lehtë për amvisëri (EL-1), çmimi i të cilit do të jetë 0,50 denarë për litër më i ulët.
Në të kundërt, mazuti M-1 NS do të shtrenjtohet për 0,694 denarë për kilogram, duke arritur në 54,273 denarë për kilogram.
Çfarë ndikoi në ndryshimin e çmimeve?
Sipas KRRE-së, çmimet referuese të derivateve të naftës në tregjet botërore kanë shënuar lëvizje të ndryshme. Benzinat kanë regjistruar ulje mesatare prej 8,120%, ndërsa çmimi referues i dizelit është rritur me 0,404%.
Vaji ekstra i lehtë ka shënuar ulje prej 0,074%, kurse mazuti është shtrenjtuar me 2,060%.
Në llogaritjen e çmimeve është marrë parasysh edhe vendimi i Qeverisë për uljen e TVSH-së për EURODIZEL-in në 10%, si dhe ulja e akcizës me 4 denarë për litër për benzinat EUROSUPER BS-95 dhe BS-98 dhe për EURODIZEL-in.
Çmimet e reja do të zbatohen nga mesnata, më 27 tetor 2026.