Një ngjarje tronditëse është zbuluar në Uells, ku një 60-vjeçar është dënuar me mbi dy vjet burg pasi mbajti trupin e pajetë të nënës së tij në frigorifer për rreth tre vite, ndërsa vazhdonte të përfitonte pensionin dhe ndihmat sociale në emrin e saj.
Sipas autoriteteve, burri nuk njoftoi institucionet për vdekjen e 89-vjeçares dhe gjatë kësaj periudhe përfitoi në mënyrë të paligjshme rreth 78 mijë paund (afërsisht 91 mijë euro) nga pagesat shtetërore.
Hetimet zbuluan se pas vdekjes së nënës, ai bleu një frigorifer të madh dhe e vendosi trupin e saj brenda, duke e mbajtur të fshehur për vite me radhë. Ndërkohë, pensioni dhe përfitimet e tjera vazhduan të derdheshin në llogarinë bankare të saj, të cilat ai i përdorte.
Gjykata e Cardiff e shpalli fajtor për mashtrim dhe për fshehjen e trupit, duke e dënuar me dy vjet e katër muaj burg.
Gjatë procesit gjyqësor, mbrojtja argumentoi se 60-vjeçari kishte kaluar një gjendje të rënduar emocionale dhe psikologjike pas humbjes së nënës, me të cilën kishte jetuar për dekada dhe për të cilën ishte kujdesur prej shumë vitesh. Sipas avokatit, ai nuk e pranonte dot ndarjen dhe vazhdonte të sillej sikur ajo ishte ende gjallë.
Megjithatë, gjykata vlerësoi se ai kishte mashtruar qëllimisht autoritetet për një periudhë të gjatë, duke përfituar në mënyrë të paligjshme nga fondet publike, çka çoi në dënimin e tij.
Be First to Comment