Një 21-vjeçar shqiptar po hetohet në gjendje të lirë nga autoritetet italiane, pasi ndaj tij është ngritur një kallëzim për dhunë seksuale nga një 18-vjeçare gjermane.
Sipas mediave italiane, e reja kishte shkuar për pushime në rivierën e Riminit së bashku me dy shoqe gjatë fundjavës së parë të korrikut. Ajo dhe mikeshat e saj ishin njohur me 21-vjeçarin, i cili jeton prej vitesh në Itali, dhe kishin vendosur të takoheshin në një diskotekë në mbrëmjen e 5 korrikut.
Pas disa orësh së bashku, grupi është zhvendosur në plazh. Sipas kallëzimit të bërë nga 18-vjeçarja, pasi kishin konsumuar pije alkoolike, ajo dhe i riu u larguan nga pjesa tjetër e grupit. Vajza pretendon se në atë moment është detyruar të kryejë marrëdhënie seksuale kundër vullnetit të saj, pavarësisht kundërshtimit dhe rezistencës që, sipas saj, ka bërë.
Një ditë më pas, ajo iu drejtua policisë dhe depozitoi kallëzim, duke nisur procedurat hetimore.
Nga ana tjetër, 21-vjeçari i ka mohuar kategorikisht akuzat. Ai ka deklaruar se mes tyre ka pasur vetëm kontakte intime me pëlqimin e të dyve dhe se nuk ka ushtruar asnjë formë dhune.
Sipas avokatit të tij, i riu është i bindur për pafajësinë dhe ka bashkëpunuar me autoritetet, duke dorëzuar vullnetarisht materialet e kërkuara për ekzaminimet forenzike.
Prokuroria e Riminit ka kërkuar zhvillimin e procedurave të nevojshme hetimore për të mbledhur provat dhe për të sqaruar plotësisht rrethanat e ngjarjes. Deri në përfundim të hetimeve, akuzat mbeten pretendime që do të vlerësohen nga autoritetet kompetente.
Be First to Comment