Shqipëria pritet të përjetojë ditë shumë të nxehta gjatë pjesës së dytë të korrikut, me temperaturat që do të rriten ndjeshëm në të gjithë vendin. Sipas parashikimeve meteorologjike, vala e të nxehtit do të nisë të intensifikohet nga e marta, ndërsa kulmi pritet në fundjavën e ardhshme, kur në disa zona termometri mund të shënojë deri në 40°C, ndërsa lokalisht edhe më shumë.
Qytetet si Shkodra, Berati, Elbasani, Gjirokastra, Tirana, Fieri dhe Lushnja pritet të regjistrojnë temperaturat më të larta. Edhe përgjatë bregdetit moti do të jetë shumë i nxehtë, ndërsa në zonat malore temperaturat do të mbeten disi më të ulëta, por sërish mbi mesataren e sezonit.
Parashikohet një periudhë me mot të qëndrueshëm dhe pa reshje, çka krijon kushte ideale për pushuesit, por njëkohësisht rrit ndjeshëm rrezikun e zjarreve, sidomos në zonat pyjore dhe kodrinore. Prania e erës në disa momente mund të favorizojë përhapjen e flakëve.
Ekspertët u bëjnë thirrje qytetarëve të tregojnë kujdes gjatë orëve më të nxehta të ditës, të shmangin ekspozimin e zgjatur në diell, të konsumojnë sa më shumë lëngje dhe të kufizojnë lëvizjet nga mesdita deri në pasdite, veçanërisht të moshuarit, fëmijët dhe personat me probleme shëndetësore.
Sipas parashikimeve, një ulje e lehtë e temperaturave mund të ndihet rreth datës 20 korrik, por moti i nxehtë pritet të rikthehet shpejt, duke bërë që pjesa më e madhe e muajit të mbetet nën ndikimin e temperaturave të larta.
Be First to Comment