Pak orë para protestës kombëtare të paralajmëruar përpara Kryeministrisë, kreu i Partisë Demokratike, Sali Berisha, ka bërë një thirrje të fortë për qytetarët që t’i bashkohen masivisht tubimit.
Në deklaratën e tij, Berisha e cilësoi protestën si një “kryengritje paqësore”, duke paralajmëruar se ajo do të jetë ndër më të fuqishmet që ka njohur Shqipëria në vitet e fundit.
Ai nuk kurseu akuzat ndaj qeverisë dhe kryeministrit Edi Rama, duke i bërë thirrje qytetarëve të ngrihen kundër asaj që ai e cilësoi si “padrejtësi dhe abuzim me pushtetin”.
“Kjo do të jetë kryengritja paqësore më e fuqishme. Qytetarët do të ngrihen për të mbrojtur dinjitetin e tyre përballë një regjimi që i ka dëmtuar,” – u shpreh Berisha, duke shtuar se sipas tij, vendimet e fundit të qeverisë janë ndër më të rëndat për vendin.
Ndër arsyet kryesore të protestës, ai përmendi edhe çmimet e larta të naftës, duke akuzuar qeverinë për mungesë mbështetjeje ndaj fermerëve, ndryshe nga vendet e tjera europiane.
Sipas Berishës, kjo protestë nuk do të ndalet nga asgjë, ndërsa e cilësoi atë si një moment vendimtar për vendin.
Be First to Comment