Një tërmet i fuqishëm me magnitudë 7.8 ballë ka goditur jugun e Filipineve, duke shkaktuar viktima, dëme të konsiderueshme materiale dhe momente paniku mes banorëve.
Sipas autoriteteve, të paktën 19 persona kanë humbur jetën dhe 134 të tjerë janë plagosur nga lëkundjet e forta që goditën zonën pranë qytetit General Santos në ishullin Mindanao. Tërmeti ndodhi në një thellësi prej rreth 10 kilometrash, çka bëri që goditja të ndihej me intensitet të lartë në sipërfaqe.
Pamjet e publikuara në rrjetet sociale tregojnë momentin dramatik kur disa ndërtesa shemben, ndërsa nxënës të frikësuar dëgjohen duke bërtitur dhe duke u larguar me panik nga zonat e rrezikuara.
Pas tërmetit, Filipinet, Indonezia dhe Japonia lëshuan paralajmërime për cunami, të cilat u hoqën më vonë pasi rreziku u vlerësua i kufizuar.
Ekipet e emergjencës vijojnë operacionet e kërkim-shpëtimit dhe ndihmën për banorët e prekur, ndërsa autoritetet po vlerësojnë shkallën e dëmeve të shkaktuara nga fatkeqësia natyrore.
Presidenti Ferdinand Marcos Jr. ka urdhëruar mobilizimin e menjëhershëm të të gjitha agjencive shtetërore dhe u ka bërë thirrje banorëve të zonave bregdetare të ndjekin udhëzimet e autoriteteve.
Ndërkohë, ekspertët paralajmërojnë se pasgoditje të forta mund të ndodhin edhe në orët dhe ditët në vijim, ndërsa bilanci i viktimave mund të ndryshojë me vazhdimin e operacioneve të kërkim-shpëtimit.