IHMK paralajmëron ndryshim të motit: Reshje, rrufe dhe stuhi të shkurtra në disa zona
Instituti Hidrometeorologjik i Kosovës (IHMK) ka bërë të ditur se sot vendi do të karakterizohet nga mot kryesisht me diell, por me vranësira të pjesshme gjatë ditës.
Sipas parashikimeve, gjatë mesditës dhe pasdites pritet shtim i vranësirave konvektive, të cilat në disa rajone mund të sjellin reshje lokale shiu, bubullima dhe shkarkesa rrufesh.
IHMK njofton se në zona të caktuara të izoluara ekziston mundësia e rrebesheve më të fuqishme, erërave të përkohshme me intensitet të lartë, si dhe reshjeve të breshrit.
Reshjet pritet të kenë karakter lokal dhe nuk do ta përfshijnë të gjithë territorin e Kosovës. Në disa pjesë të vendit mund të paraqiten stuhi të shkurtra, ndërsa zona të tjera mund të mbeten me mot kryesisht të thatë.
Temperaturat maksimale gjatë ditës pritet të arrijnë nga 31 deri në 33 gradë Celsius. Era do të fryjë kryesisht nga veriperëndimi me intensitet të lehtë deri mesatar, por mund të forcohet përkohësisht në zonat ku do të zhvillohen procese stuhore.
IHMK u ka bërë thirrje qytetarëve që të ndjekin njoftimet zyrtare për gjendjen e motit dhe të tregojnë kujdes gjatë aktiviteteve në ambiente të hapura, veçanërisht gjatë paraqitjes së rrufeve, erërave të forta dhe reshjeve intensive.
Be First to Comment