Tensione të forta u shënuan gjatë seancës së sotme në Kuvendin e Maqedonisë së Veriut, ku debati mes deputetëve kaloi në përplasje të ashpra verbale.
Gjithçka nisi kur deputeti i Aleanca për Shqiptarët, Halil Snopce, i drejtoi pyetje ministrit të Transportit, Aleksandar Nikollovski, lidhur me Ilir Meta.
Nikollovski u shpreh se e konsideron Metën mik dhe kritikoi mënyrën se si Shqipëria ka vepruar ndaj tij. Në replikë, ai përmendi edhe Arben Taravari dhe një takim me Edi Rama, duke ngritur aludime për kërkim ndihme në lidhje me një çështje të caktuar.
Debati u ashpërsua më tej kur Snopce akuzoi Nikollovskin për lidhje me regjimin e Nikola Gruevski, duke pretenduar se ai vazhdon të jetë i afërt me të. Ai shtoi gjithashtu se ministri është takuar me Gruevskin në Hungari dhe e akuzoi publikisht për korrupsion.
Situata u tensionua edhe më shumë kur, pas përplasjes verbale, një deputet i VMRO-DPMNE provokoi deputetin e ASH-së, Rijad Shaqiri, duke krijuar një moment kritik që për pak sa nuk përfundoi në përplasje fizike mes tyre.