Kontrolle të shtuara në Vlorë, Policia ndalon automjete dhe verifikon personat
Policia ka shtuar kontrollet në disa prej akseve kryesore të qytetit të Vlorës, në kuadër të masave për rritjen e sigurisë gjatë fundjavës.
Një prej pikave të kontrollit është vendosur në rrethrrotullimin e Transballkanikes, ku efektivët ndalojnë automjete dhe kryejnë verifikime ndaj drejtuesve dhe pasagjerëve.
Në fokus të veçantë janë automjetet me xhama të zinj, ndërsa policia po kryen edhe verifikimin e identitetit të personave që udhëtojnë në to. Kontrollet synojnë evidentimin e personave në kërkim, si dhe parandalimin e rasteve të posedimit të paligjshëm të armëve.
Kontrolle të ngjashme po zhvillohen edhe në pika të tjera të qytetit, ku është shtuar prania e efektivëve në rrugët kryesore.
Sipas masave të ndërmarra, kontrollet kanë për qëllim parandalimin e veprimtarive të paligjshme, identifikimin dhe kapjen e personave të kërkuar, si dhe garantimin e rendit dhe sigurisë publike gjatë fundjavës.