Moderatori i njohur kosovar, Alaudin Hamiti, ka ndarë një rrëfim personal mbi një sfidë shëndetësore që e ka shoqëruar prej vitesh.
Ai ka treguar se gjithçka nisi nga një analizë e thjeshtë rutinë, e cila i ndryshoi rrjedhën e jetës pasi u diagnostikua me diabet të tipit 2. Ky moment, sipas tij, ishte fillimisht tronditës dhe i vështirë për t’u përballuar.
“Para 6 vitesh, një kontroll i zakonshëm më përballi me një realitet krejt tjetër. Mendova se kisha probleme me zemrën, por rezultoi të ishte diabeti i tipit 2,” është shprehur Hamiti.
Me kalimin e kohës, ai thekson se ka arritur ta pranojë këtë gjendje dhe ta shohë si një shtysë për të ndryshuar stilin e jetesës. Ai ka bërë ndryshime të rëndësishme në ushqim dhe aktivitet fizik, duke u fokusuar më shumë te kujdesi për shëndetin.
“Kam nisur të ushqehem më shëndetshëm dhe të ushtroj rregullisht. Këto ndryshime më kanë ndihmuar të ndihem më mirë dhe më energjik çdo ditë,” ka shtuar ai.
Përmes këtij rrëfimi, Hamiti synon të ndërgjegjësojë edhe të tjerët për rëndësinë e kontrolleve të rregullta dhe një jetese të shëndetshme, duke treguar se edhe përballë sfidave, ndryshimi është i mundur.