Shtetet e Bashkuara i kanë dorëzuar Izraelit avionin e parë furnizues me karburant KC-46, nga të paktën gjashtë të planifikuar, në një zhvillim që konsiderohet me rëndësi strategjike për operacionet ushtarake në Lindjen e Mesme.
Lajmi është konfirmuar nga Forcat Ajrore Izraelite (IDF), të cilat bënë të ditur se avioni do të mbajë emrin “Gideon” dhe pritet të hyjë shpejt në shërbim pas disa rregullimeve teknike.
Sipas IDF-së, KC-46 rrit ndjeshëm kapacitetet operacionale të Izraelit, duke i mundësuar forcës ajrore më shumë fleksibilitet për misione në distanca të gjata dhe operacione në rajon.
Avioni ka aftësi të furnizojë disa avionë luftarakë në ajër dhe të qëndrojë për orë të gjata në fluturim pa ndërprerje. Ai është projektuar për të mbështetur avionët F-35, F-16 dhe F-15, si dhe për të ofruar funksione shtesë logjistike dhe mjekësore, përfshirë transport personeli dhe raste emergjente.
Gjatë ceremonisë së prezantimit, Shefi i Shtabit të Përgjithshëm të Izraelit, gjeneralmajor Eyal Zamir, komentoi gjithashtu situatën rajonale, duke deklaruar se aftësitë ushtarake të Iranit janë dëmtuar dhe programi i tij bërthamor është vonuar.
Dorëzimi i KC-46 shihet nga Izraeli si një hap i rëndësishëm për forcimin e kapaciteteve të tij ushtarake dhe zgjerimin e aftësisë për operacione afatgjata në rajon.