Si dyshohet se u përfituan 200 mijë euro nga Raiffeisen Bank, zbardhen detaje nga skema
Një rast i pazakontë mashtrimi financiar ka vënë në lëvizje autoritetet, pasi Raiffeisen Bank ka denoncuar një humbje të dyshuar prej rreth 200 mijë eurosh si pasojë e një problemi në sistemin e pagesave.
Sipas raportimeve, më 29 korrik përfaqësues të bankës janë paraqitur pranë Policisë së Shtetit për të raportuar rastin, duke kërkuar hetim për një seri transaksionesh të dyshimta.
Dyshohet se më shumë se 40 persona kanë përfituar shuma të ndryshme parash përmes një anomalie teknike në sistemin elektronik të bankës. Sipas hetimeve paraprake, personat kanë kryer tërheqje të shumta me vlera të vogla, kryesisht rreth 100 euro, duke krijuar në total një dëm të konsiderueshëm financiar.
Në qendër të hetimeve është dyshimi se disa persona kanë shfrytëzuar një problem në funksionimin e platformës online, ku për një periudhë të caktuar transaksionet mund të kryheshin edhe në kushte kur llogaritë nuk kishin fonde të mjaftueshme.
Sipas të dhënave të bëra publike, një nga personat e dyshuar, me njohuri në fushën e teknologjisë, dyshohet se ka identifikuar këtë dobësi të sistemit dhe më pas e ka ndarë informacionin me persona të tjerë.
Hetuesit dyshojnë se për të shmangur zbulimin, janë përdorur llogari të ndryshme bankare dhe janë kryer transferta në shuma të vogla. Disa prej personave të përfshirë dyshohet se kanë vënë në dispozicion të dhënat e tyre bankare në këmbim të përfitimeve financiare.
Raiffeisen Bank ka dorëzuar pranë autoriteteve listën e personave që dyshohet se kanë përfituar nga këto veprime, ndërsa hetimet vijojnë për të përcaktuar përgjegjësitë dhe përmasat e plota të rastit.
Autoritetet pritet të japin më shumë detaje pas përfundimit të procedurave hetimore.
Be First to Comment