Trump përgatit terrenin për 2028, mbështetësve u tregon emrin që duhet të votojnë

Trump sinjalizon mbështetjen për JD Vance në garën presidenciale të vitit 2028

 

Presidenti i SHBA-së, Donald Trump, duket se po shqyrton mundësinë që zëvendëspresidenti i tij, JD Vance, të jetë kandidati që do të mbështesë për zgjedhjet presidenciale të vitit 2028.

 

Sipas raportimeve të gazetës “Washington Post”, gjatë një takimi privat me donatorë në Zyrën Ovale, Trump është shprehur se dëshiron që Vance të jetë ai që do të garojë për Shtëpinë e Bardhë në zgjedhjet e ardhshme.

 

“Në fund të fundit, ne duhet të zgjedhim JD”, raportohet të ketë thënë Trump gjatë takimit, sipas burimeve të njohura me diskutimin.

 

Megjithatë, pavarësisht këtij sinjali, disa këshilltarë dhe aleatë të presidentit theksojnë se vendimi përfundimtar ende nuk është marrë. Ata kujtojnë se Trump shpesh ka mbajtur të hapura opsionet dhe ka shfaqur mbështetje për figura të ndryshme brenda Partisë Republikane.

 

Krahas JD Vance, një tjetër emër që është përmendur si kandidat i mundshëm është Sekretari i Shtetit Marco Rubio. Në të kaluarën, Trump ka deklaruar se të dy mund të përbëjnë një zgjedhje të fortë për të ardhmen e republikanëve.

 

Mbështetja e mundshme për Vance vjen në një kohë kur Trump nuk ka bërë asnjë deklaratë për një mandat të tretë presidencial, i cili nuk lejohet nga Kushtetuta amerikane.

 

Sipas disa burimeve pranë presidentit, Trump e sheh Vance si një figurë të rëndësishme për të ardhmen e Partisë Republikane, por ende nuk dihet se kur mund të vijë një mbështetje zyrtare.

 

Ndërkohë, zhvillimet politike në SHBA pritet të ndikohen edhe nga zgjedhjet e mesit të mandatit, të cilat mund të ndikojnë në fuqinë politike të kandidatëve të mundshëm për vitin 2028.