Në një intervistë televizive, gazetari Andi Tela komentoi zhvillimet e fundit që lidhen me çështjen e Belinda Ballukut, duke theksuar se rasti ka kaluar kufijtë e debatit politik në Shqipëri dhe ka tërhequr interes edhe jashtë vendit.
Sipas Telës, rëndësia e çështjes u reflektua edhe nga interesimi i mediave të huaja, pasi një gazetar estonez ngriti pyetje lidhur me situatën në Shqipëri dhe hetimet që po zhvillohen. Ai u ndal edhe te debati publik mbi klasifikimin e rastit si “prokurim publik” apo “korrupsion”, duke theksuar se përgjegjësitë penale përcaktohen nga hetimet dhe nga roli konkret i zyrtarëve të përfshirë.
Tela deklaroi se çështja lidhet edhe me pritshmëritë e Bashkimit Evropian në kuadër të procesit të integrimit, duke përmendur interesimin e partnerëve ndërkombëtarë për mënyrën se si institucionet shqiptare do ta trajtojnë këtë rast.
Ai shtoi se hapat e ardhshëm tashmë varen nga SPAK-u, i cili sipas burimeve që ai përmendi, mund të ndërmarrë veprime të reja procedurale në ditët në vijim, përfshirë kërkesa të tjera në Kuvend dhe masa të mundshme sigurie, në varësi të zhvillimit të hetimeve.