Kreu i Grupit Parlamentar të PS-së, Taulant Balla, ka njoftuar se në seancën e sotme të Kuvendit do të shqyrtohen ndryshime në ligjin “Për Turizmin”, të cilat synojnë përmirësimin e kushteve në zonat turistike gjatë sezonit veror.
Sipas Ballës, një nga ndryshimet kryesore parashikon ndalimin e punimeve të ndërtimit në zonat turistike gjatë sezonit, me qëllim shmangien e zhurmave dhe shqetësimeve për pushuesit. Ai theksoi se kjo masë vjen pasi, sipas tij, bashkitë nuk arritën të zbatonin kufizime të tilla.
Një tjetër ndryshim i rëndësishëm lidhet me garantimin e aksesit të lirë në bregdet. Projektligji ndalon vendosjen e gardheve, mureve, barrierave apo çdo pengese tjetër fizike që kufizon lëvizjen e qytetarëve drejt detit ose përgjatë vijës bregdetare.
Balla u shpreh se, me hyrjen në fuqi të ligjit, të gjitha subjektet që administrojnë stacione plazhi do të jenë të detyruara të sigurojnë akses të pandërprerë për publikun, duke e cilësuar këtë si një zgjidhje përfundimtare për problemin e barrierave në plazhe.
Be First to Comment