Elisa Spiropali i shkruan Edi Ramës: “Nuk mjafton të fitosh zgjedhjet, duhet të rikthesh besimin e qytetarëve”
Elisa Spiropali i ka drejtuar një letër kryeministrit Edi Rama, ku komenton protestat e fundit në Tiranë dhe pakënaqësitë e qytetarëve ndaj qeverisjes.
Në mesazhin e saj, Spiropali i kërkon Ramës ta shohë situatën jo vetëm nga këndvështrimi i pushtetit, por edhe nga perspektiva e qytetarëve që ndihen të papërfaqësuar dhe të padëgjuar.
Ajo e lidh përshkallëzimin e protestave me një krizë më të thellë besimi, duke theksuar se zemërimi nuk ka të bëjë vetëm me një çështje konkrete, por edhe me mënyrën se si merren vendimet dhe funksionojnë institucionet.
Sipas Spiropalit, protestuesit kërkojnë drejtësi, transparencë, meritokraci dhe mundësi të barabarta. Ajo kritikon ndikimin e lidhjeve politike në punësim dhe ekonomi, si dhe kërkon që institucionet të mos shërbejnë për interesat e një grupi të privilegjuar.
“Nuk mjafton të fitosh zgjedhjet, nëse humbet besimin e njerëzve”, është një nga mesazhet kryesore të letrës së saj drejtuar kryeministrit.
Spiropali thekson se situata kërkon zgjidhje politike dhe dialog të vërtetë, jo vetëm reagim policor. Ajo propozon diskutime për reforma themelore, një sistem zgjedhor që garanton përfaqësim real, ndarjen e partisë nga shteti dhe institucione më të pavarura.
Në letër, ajo i bën thirrje Ramës që edhe Partia Socialiste të hapet ndaj ndryshimit, duke kërkuar më shumë demokraci të brendshme, meritë dhe hapësirë për një brez të ri drejtuesish.
Sipas saj, një parti që nuk ndryshon nga brenda rrezikon të detyrohet të ndryshojë nga presioni i jashtëm, ndërsa pushteti nuk duhet të ngatërrojë shumicën parlamentare me besimin e qytetarëve.
Në përfundim, Spiropali i kërkon Ramës të marrë përgjegjësi dhe të ndërmarrë vendime konkrete për të rikthyer besimin e publikut.
“Shqipëria mbi të gjitha. Jo partia mbi të gjitha. As pushteti mbi të gjitha”, shkruan ajo, duke e mbyllur letrën me thirrjen që vendi të mos e shohë shoqërinë si kundërshtare, por të punojë për ta ngritur atë.
“Tani nuk mjafton të fitosh zgjedhje. Tani duhet të rikthesh besimin. Tani duhet të fitojë Shqipëria”, përfundon Spiropali.